Poslovne vijesti - Makedonija

Идниот месец - трет јавен повик за ИПАРД

Во втората половина на февруари ќе биде објавен третиот јавен повик за доставување барања за користење финансиски средства од петтата компонента на Инструментот за претпристапна помош за рурален развој на Европската Унија - ИПАРД програма за периодот 2007-2013 година, јави МИА.

Како што стои во најавата на интернет-страницата на Агенцијата за финансиска поддршка во земјоделството и руралниот развој, со третиот јавен повик што ќе трае 45 дена од денот на објавување во дневните весници, на располагање ќе бидат ставени 20,72 милиони евра од кои 75 отсто се придонеси од ЕУ, а 25 проценти се од Буџетот на Република Македонија и ќе бидат пресметани во денарска противвредност со важечки курс за февруари 2011.

Финансиските средства се наменети за инвестиции на земјоделските стопанства со цел нивно преструктурирање и надградба за постигнување на стандардите на ЕУ, за инвестиции за преработка и маркетинг на земјоделските и рибни производи со нивно преструктурирање и надградба за достигнување стандардите на ЕУ и за диверзификација и развој на руралните економски активности.

Со досегашните два јавни повика за ИПАРД, првиот објавен во декември 2009 година, а вториот во септември лани, беа понудени вкупно 64,3 милиони евра, односно 24,3 милиони евра на првиот оглас и уште 40 милиони евра на вториот.

Во текот на 2011 година ќе бидат објавени три ИПАРД-огласи.

Целта на ИПАРД-програмата 2007-2013 е преку соодветни мерки за поддршка на земјоделството и руралниот развој да се подобри конкурентноста на земјоделското производство и земјоделско-прехранбениот сектор.